Prøveprosjekt HentMeg i Odda
11. februar blir det offisiell markering i Odda for prøveprosjektet HentMeg, der du kan bestilla bussen når du treng den, i staden for å følgja faste rutetider.
I staden for å sjekka reiseplanleggaren eller rutetabellen, kan folk i området Odda/Tyssedal tinga bussen sjølv på visse tider av dagen. Bestillinga skjer på hentmeg.no eller ved å ringe kundesenteret til Skyss. Bussen køyrer etter «først til mølla»-prinsippet og hentar deg på næraste busshaldeplass, og køyrer deg til busshaldeplassen som ligg nærast dit du skal.
![](https://bussmagasinet.no/wp-content/uploads/2020/02/hentmegodda_dame.png)
Billettprisen er den same som for vanleg kollektivtransport.
Prøveprosjektet er basert på løysinga som kollektivselskapet Kolumbus i Rogaland har etablert i Sauda. Liknande løysingar er òg å finna i Kongsberg, Bodø og Bø i Telemark.
Målet med prosjektet er meir nøgde kundar og betre bruk av kollektivmidla. Det er betre for miljøet om bussen berre køyrer når det trengs, og står i ro når ingen skal reise.
Området Odda er valt grunna låge passasjertal utanom skolekøyringa, og reisemåla i Odda ligg sentralt, som fritidstilbod, kommunale tenester og liknande.
HentMeg i Odda er eit samarbeid mellom Skyss, Kolumbus, Ullensvang kommune og teknologiselskapa SpareLab og Geta.